Harðar deilur um kolmunna

Fulltrúar Evrópusambandsins hafa komið með tillögu að kvótasetningu kolmunna sem myndi skerða hlut Norðmanna töluvert en hagur Evrópusambandsins og Færeyja myndi hins vegar vænka í öfugu hlutfalli. Greint er frá þessu á miðlinum Kystmagasinet.

Tillaga ESB var lögð fram á fundi strandríkja um skiptingu uppsjávarafla í Norðaustur-Atlantshafi sem haldinn var í London 10.-11. júní en samkvæmt henni myndi kvóti Noregs í kolmunna lækka úr 26,2% í 5,8%. Strandríkin sem gera kröfu um hlutdeild í uppsjávarafla á þessu svæði eru Noregur, Grænland, Færeyjar, Bretland, Evrópusambandið og Rússland, auk Íslands. Ofveiði uppsjávarstofna í Norðaustur-Atlantshafi er viðvarandi vandamál.

Frétt af mbl.is

Segja nóg komið og hóta aðgerðum

Norðmenn í uppnámi

Tillagan olli mikilli reiði hjá norsku sendinefndinni og varð til þess að ekki var hægt að klára fyrirliggjandi mál fundarins. Engar viðræður áttu sér stað um aðrar uppsjávartegundir á borð við makríl og síld. Norðmenn sökuðu fulltrúa ESB um að grafa undan viðræðunum.

„Þessi tillaga brýtur í bága við alþjóðlega samninga og viðurkennd viðmið um sanngjarna skiptingu. Þetta er grafalvarlegt og ógnar framtíðarsýn um sjálfbæra nýtingu fiskistofna á alþjóðlegum hafsvæðum,“ segir Audun Maråk, framkvæmdastjóri samtaka norskra útgerðarmanna, Fiskebåt.

Útbreiðsla kolmunna makríls og norsk-íslenskrar síldar. Kort/mbl.is

Maråk segir að Noregur hafi haldið sig við áður samþykkta hlutdeild í kjölfar þess að fyrra samkomulag strandríkja um kolmunna liðaðist í sundur fyrir nokkrum árum. Önnur ríki hafi hins vegar aukið sinn kvóta einhliða. Hann segir að tillaga ESB feli í sér „fjandsamlega og ósanngjarna“ framkomu gagnvart Noregi.

Fiskebát telur að stjórnvöld ættu að mótmæla tillögu Evrópusambandsins formlega og undirstrikar að ekki sé hægt að samþykkja að samningsaðilar mæti til viðræðna með svo illa ígrundaða tillögu. Það muni hafa neikvæðar afleiðingar fyrir samband Noregs og ESB.

Erfiðar samningaviðræður

Samningaviðræður strandríkjanna um uppsjávarstofna í Norðaustur-Atlantshafi hafa staðið yfir í áraraðir án niðurstöðu. Ríkin hafa ekki náð samkomulagi um skiptingu árlegs heildarkvóta stofnanna sem Alþjóðahafrannsóknaráðið leggur til. Ríkin hafa því gefið út sína eigin kvóta, sem hefur leitt til þess að verulega hefur verið veitt umfram ráðgjöf.

Frétt af mbl.is

Segir Norðmenn bera mesta ábyrgð á ofveiði

• Blogga um frétt