Viðskipti | Morgunblaðið | 20.6.2025 | 9:30

Norðurlöndin horfa til sjálfbærra fjárfestinga

Philip Ripman, sjóðstjóri hjá Storebrand, ræðir um stefnur og strauma í eignastýringu og framtíð sjálfbærra fjárfestinga. mbl.is/Eggert Jóhannesson

Philip Ripman, sjóðstjóri hjá Storebrand, deildi innsýn sinni í helstu strauma, hreyfingar á mörkuðum og framtíð ábyrgra fjárfestinga í samtali við Morgunblaðið. Hann segir Norðurlöndin horfa í meiri mæli til sjálfbærra fjárfestinga. Spurður um nýjustu þróun á mörkuðum benti Philip á aukna skautun sem rekja mætti til pólitískra aðstæðna í Bandaríkjunum. „Athygli markaðarins beinist nú að miklu leyti að Bandaríkjunum, sérstaklega þar sem Trump hefur hafið sitt annað kjörtímabil,“ sagði hann og lagði áherslu á að tollar og lagabreytingar, einkum stórt skattalagafrumvarp og mögulegt afnám hluta laga sem miða að lækkun verðbólgu (e. Inflation Reduction Act), hefði skapað óvissu.

„Það er erfitt að átta sig á hvaða aðgerða Bandaríkin muni raunverulega grípa til,“ bætti hann við. Þó hvatti hann fjárfesta til að „horfa til langs tíma og hunsa þær upplýsingar sem aðeins hreyfa markaðinn til skamms tíma“. Að hans mati væru alþjóðasamskipti, sérstaklega milli Bandaríkjanna og Kína, enn mikilvægur drifkraftur í mótun efnahagsumhverfisins, þó að það væri „allt of snemmt að draga neinar endanlegar ályktanir“.

Sífellt fleiri hverfa frá sjálfbærum fjárfestingum

Philip nefndi þróun grænna hlutabréfa sem eitt stærsta stefnumynstur síðasta árs. „Það er margt að gerast á sviði ESG-fjárfestinga, það er að segja fjárfestinga er snúa að umhverfis-, félagslegum og stjórnarlegum þáttum,“ sagði hann og hvatti fjárfesta til að einblína á hagnýta þætti eins og endurnýjanlega orku. „Við höfum séð betri árangur hjá fyrirtækjum sem eru að fjölga orkugjöfum sínum og bjóða raunhæfar lausnir,“ útskýrði hann.

Hann dró einnig fram stafræna þróun og netöryggi. „Það er vaxandi áhersla á að vernda einstaklinga og fyrirtæki. Allt er að verða stafrænt og sífellt mikilvægara að tryggja stafrænt öryggi. Það gleymist oft að slíkar lausnir eru liður í sjálfbærni.“

Þrátt fyrir óstöðugar aðstæður vegna viðskiptatolla og breytinga á stefnumálum hefur Storebrand, að sögn Philips, staðið sig vel í því umhverfi. „Við höfum náð góðum árangri vegna þess að við höldum fókus á langtímamarkmiðum,“ sagði hann.

„Já, við höfum séð bakslag á sviði sjálfbærra fjárfestinga og sífellt fleiri fjárfestar, einkum í Bandaríkjunum, eru að hverfa frá þessum áherslum,“ viðurkenndi hann. „Það á þó ekki við um alla og höfum við og fleiri aukið áhersluna á endurnýjanlega orku, heilsu kvenna og stafvæðingu.“

Þvert á áhyggjur af minnkuðu vægi sjálfbærni hefur Philip orðið var við hið gagnstæða, einkum á Norðurlöndunum. „Fleiri stofnanir eru að gera ESG að lykilþætti í stefnumörkun sinni,“ sagði hann. Þó að svæðisbundin mismunur væri til staðar.

„Ég tel það jákvætt að við séum farin að sjá hverjir raunverulega standa með sjálfbærni og hverjir ekki,“ bætti hann við og nefndi sérstaklega að stofnanir á Norðurlöndum væru áfram leiðandi á þessu sviði.

Philip lagði áherslu á að sjóðurinn sem hann stýrir, Storebrand Global Solutions, hefði skilað 3,5% umfram markaðinn það sem af er ári. „ESG nær yfir 10 af 11 atvinnugreinum, þannig að það veitir aðgang að fjölbreyttum fyrirtækjum,“ útskýrði hann. „Þetta snýst ekki um gildismat, heldur raunhæfar lausnir.“

Hann sagði þó að aukin pólitísk umræða í kringum ESG skapaði áskoranir, en var áfram bjartsýnn á framtíð slíkra fjárfestinga: „Við verðum að snúa okkur aftur að lausnum sem byggjast á vörum og þjónustu sem leysa raunveruleg vandamál. Það mun skila okkur langtímahagnaði,“ sagði Philip að lokum.